BR LA UNION – Maiyannurot iti inisyatiba ni Secretary of Interior and Local Government Jonvic Remulla, nainget nga ipatungpal dagiti otoridad ti naituding a curfew hour iti panag-videoke ti rabii.
Impaganetget ni PLCOL. Lawrence Ganuelas, Information Officer iti La Union Police Provincial Office, a napateg ti panagtulnog iti inisyatiba ken iti agraraira nga ordinansa tapno mamantinir ti natalna a komunidad iti disoras ti rabii ken oras ti panaginana wenno pannaturog.
Ti direktiba ti Department of Interior and Local Government, ket panangpabileg iti ordinansa kadagiti ili ken siyudad, nga iparit dagiti agparnuay ti ariwawa iti rabii, agsipudta makasinga ken maka-istorbo dagitoy iti rumbeng koma a naulimek a panaginana.
Impalagip manen ti opisyal a maipalubos laeng ti panag-videoke agingga alas 10:00 ti rabii.
Kabinnulig dagiti otoridad a mangipatungpal iti nasao a direktiba ken ordinansa dagiti barangay officials nangruna dagiti barangay tanod, isunga kasapolan nga i-monitor dagiti barangay dagiti agus-usar ti videoke iti rabii.
Inayon pay ni Ganuelas nga ad-adu dagiti positibo a feedback manipud iti publiko maipapan iti implementasyon ti ordinansa, agsipudta ibaba na dagiti insidente ti riribok ken maliklikan ti pannaka-istorbo gapu iti irresponsable a panagkakanta ken panag-videoke dagiti sumagmamano a tattao.
