BR LA UNION – Nangiruar ti freeze order iti Court of Appeals kontra kadagiti sanikua ti maysa a “prominent” wenno nalatak a mammanday linteg a mairam-raman iti maipagarop nga anomalya iti flood control projects, segun iti Anti-Money Laundering Council (AMLC).
Iti waragawag ti AMLC, maipagarop a nakakita ti korte ti probable cause tapno maikonektar kadagiti assets, kabilang ti maysa a business associate ken maysa a corporate entity, iti kaso a plunder, bribery, ken graft.
Saan metten a ninaganan ti ahensya dagiti dadduma a ,mairam-raman.
Sakopen ti freeze order iti 25 bank accounts ken 10 insurance policies a nakanagan iti mammanday linteg.
Karaman pay iti 27 bank accounts, 10 insurance policies, ken maysa nga investment account ti maipagarop a kasosyo iti negosyo, agraman ti dua a bank accounts, pito a property accounts, ken maysa a real estate property a nakarehistro iti corporate entity.
Immani ti nakaru a rurod iti publiko ti isyu ti anomalya iti flood control projects kalpasam a pimmalya ti sumagmamano a flood mitigation structures idi kangitingitan ti napalabas a typhoon season.
Nangigubway daytoy iti nalawa a protesta ken nakaapekto iti taray iti ekonomiya ti pagilian.
Kabayatanna, imbaga ti AMLC a nakaidatag dan ti 12 a petisyon para iti civil forfeiture kontra iti sanikua dagiti mapapati a konektado iti nasao nga anomalya.
