BR LA UNION – Pakabuklan nga 6,000 a mannalon ken mangngalap manipud ili a Bacnotan ken San Gabriel ditoy probinsiya ti La Union iti nagbalin a benipisyaryo ti Presidential Assistance for Farmers and Fisherfolk (PAFF) program idi Abril 27, segun iti Department of Agriculture – Regional Field Office I.
Segun iti ahensiya, ti nasao nga ayuda pinansiyal ket maysa nga istratehiko nga addang ti gobyerno tapno matulongan dagiti mannalon a mapalag-anan manipud iti epekto ti nangato a gastos iti produksiyon ken presyo ti langis ken masiguro ti agtultuloy a seguridad iti taraon.
Naamwan a tunggal benipisyaryo ket immawat ti Php 2,325 a cash assistance.
Idiay ili ti Bacnotan, nagballigi ti pannakaiwaras ti tulong pinansiyal babaen ti Presidential Assistance for Farmers and Fisherfolk Program idiay Bacnotan Farmers’ Park and Civic Center, a nakipasetan ti ginasut a benepisyaryo manipud iti sektor ti agrikultura ken mangngalap.
Ti nasao a programa ket indauluan ti Department of Agriculture (DA) kabinnulig ti lokal a gobierno ti Bacnotan.
Impanamnama pay ti lokal a gobierno nga agtultuloy ti pannakikoordinarda kadagiti ahensiya ti gobierno nasyunal tapno masigurado ti agtultuloy a pannakaipaay dagiti programa ken serbisyo a makatulong kadagiti umili.
Ti regional rollout para iti nasao a programa ket agtultuloy a maipatpatungpal iti dadduma pay a lugar ditoy rehiyon uno.
Ti Presidential Assistance for Farmers and Fisherfolk (PAFF) ket maysa a nationwide initiative nga addaan tarigagay a maalay-ayan ken mapalag-an iti impact ti pabaliw-baliw a presyo nangruna iti panagngato ti presyo ti langis ken agricultural input prices.
