BR LA UNION – Umabot iti nasurok 6,000 a babbalay idiay probinsiya ti Albay iti naapektaran ti ashfall kasaruno ti panagalburoto ti Mayon Volcano idi Sabado, segun kenni Albay Governor Noel Rosal idi Lunes.
Segun kenni Rosal, iti pannakar-puog ti lava dome ti bulkan ti nangigubway ti ashfall a timmama idiay ili ti Guinobatan ken Camalig. Partikular idiay Guinobatan, a dimmanon iti maysa agingga a dua a pulgada iti kapuskol ti dapo.
Personal a bimmisita ni Vince Dizon ti Department of Public Works and Highways tapno mangisayangkat ti inspeksyon para iti clearing ken flushing operations kadagiti apektado a lugar.
Kabayatanna, passable iti Maharlika Highway agturong idiay Naga City.
Laksid iti insidente, awan iti nailista a natay wenno nasugatan.
Segun iti gobernador, nakatulong ti kinasagana dagiti residente tapno maliklikan ti nakaru a perdisyon.
Nupay kasta, naipadamag iti pannakatay ti sumagmamano a taraken nga ayop ken pannakadadael dagiti mula gaputi ashfall.
Adda pay iti report nagaburan ti dapo ken volcanic materials dagiti ayop.
Immandar ti lokal a gobyerno iti panagsuot ti face mask, partikular iti N95, gaputi peligro a gapwanan ti dapo, nangruna iti salun-at dagiti ubbing.
Iti agdama, adda ti 1,238 evacuees manipud iti uneg ti six kilometer Permanent Danger Zone (PDZ), ngem ad-adalen dagiti otoridad nu palawaen da daytoy iti 7-kilometer, a mabalin a paka-apektaran ti kanayunan a 10,000 pamilya.
Agtaltalinaed iti Alert Level 3 ti status ti bulkan, segun iti Philippine Institute of Volcanology and Seismology, a kaipapanan nga agtultuloy iti pangta ti mas napigpigsa a panagbettak.
