Nangiyusuat dagiti autoridad ti Estados Unidos ken United Kingdom iti security response kalpasan a masaripatpatan ti sumagmamano a saan nga autorisado a drone iti airspace ti RAF Lakenheath, maysa a kangrunaan a US Air Force military airbase idiay Suffolk, Eastern England.
Segun kadagiti report, nakita dagiti drone iti aglawlaw ti base nga us-usaren ti militar ti US para iti operasion dagiti fighter aircraft, pakairamanan dagiti F-15 ken F-35 fighter jets. Gapu iti insidente, dagus a nangisayangkat dagiti military personnels ti security measures tapno masigurado ti kinatalged ti pasilidad ken dagiti nadestino iti daytoy.
Pinasingkedan ti US Air Force a nalpasen ti insidente ken awan ti naipadamag a nadangran kadagiti personnels ken pannakadaael kadagiti eroplano wenno pasilidad.
Nakitinnulong met ti British Ministry of Defense kadagiti autoridad ti America tapno maimbestigaran ti insidente.
Iti agdama, agtultuloy pay laeng a maimimbestigaran no siasino ti adda iti likudan dagiti nakita a drone ken no adda iti peggad a mabalin a maited dagitoy iti seguridad ti base, a maysa a kapatgan a pasilidad ti militar ti US sadiay Europa.
