BR LA UNION – Inwaragawag ni House Deputy Speaker ken National Unity Party (NUP) chairman Ronnie Puno a nasurok kagudwa dagiti 55 a miyembro ti grupo da ket sumup-suporta iti impeachment complaints kontra kenni Vice President Sara Duterte.
Kinuna ni Puno a mangisayangkat da pay ti maysa a round ti konsultasyon kadagiti kongresista iti masakupan da sakbay iti manamnama a binnotosan inton Lunes, Mayo 11.
Aminado ni Puno nga idi immuna ket negatibo iti kapanunotan ti kaadwan iti partido seknan iti impeachment, ngem ita ket nalawagen iti mayorya, mapatta-patta nga aganay 30 a miyembro, ket pabor a maipatulod ti reklamo idiay Senado.
Impaganetget ti NUP a dagiti miyembro ket agusar ti conscience vote iti isyu a panang-patakyas iti bise presidente.
