Inwaragawag ni Interior Secretary Jonvic Remulla a maipagarup a nasaripatpatan idiay Cavite iti pugante ken negosyante a ni Atong Ang.
Segun kenni Remulla, dagos a nangisayangkat ti operasyon iti nasurok 400 a CIDG personnel kalpasan a nakaawatda ti impormasyon mainaig iti lokasion daytoy, ngem nakalibas ni Ang sakbay a simmangpetda.
Sumangsango ni Ang iti kaso a kidnapping with homicide ken serious illegal detention mainaig kadagiti mapukpukaw a mammallot.
Idi Abril, nangipaulog met iti Interpol ti red notice kontra kenkuana. Adda met ti naitukon a ₱20 million a pabuya para iti impormasion a mangitudo iti lokasion ni Ang bayat nga agtultuloy ti manhunt operation dagiti otoridad.###
