BR LA UNION – Pinaglibakan ti Philippine Air Force (PAF) iti report nga adda naka-standby nga eroplano idiay Villamor Air Base a posible a mangiluwas kenni Senador Ronald “Bato” dela Rosa agturong idiay The Hague.
Segun kenni PAF Spokesperson Col. Ma. Consuelo Castillo, normal nga operasyon iti air base ken awan ti naaw-awat nga opisyal a direktiba ti militar seknan iti nasao nga isyu.
Iti agdama, agtaltalinaed iti “white alert” status ti PAF, kaipapanan a normal iti air ken security operations.
Inlawlawag pay ni Col. Castillo nga awan ti koordinasyon a mapas-pasamak iti biang ti PAF wenno AFP para iti posible a panangiluas ti senador idiay International Criminal Court (ICC).
Iti palawag ket sungbat iti nagbalin a waragawag ni Atty. Israelito Torreon, abogado ni Dela Rosa, a maipagarop nga adda maisag-sagana nga aircraft ken composite team manipud PNP tapno arestaren iti senador.
