BR LA UNION – Mangisayangkat ti Department of Agriculture-Regional Field Office 1 iti naduma-duma a registration ken updating services iti maiganwat a 2026 Ease of Doing Business (EODB) Fair ti Anti-Red Tape Authority (ARTA) inton Domingo May 17, 2026 idiay SM La Union.
Segun iti ahensya, ti one-stop shop ket mangipaay ti mas napaspaspas ken nalaklaka a proseso ti panagparehistro ken panagala iti kasapolan a dokumento.
Kabilang dagiti serbisyo nga idiaya ti ahensiya, ket iti RSBSA enrollment ken updating, registration ken renewal iti livestock and poultry handler’s license ken transport carrier, agraman FFEDIS registration para kadagiti agri-enterprise.
Maysa daytoy a napintas a gundaway para kadagiti mannalon, mangngalap, ken handlers ti livestock/poultry nga agparehistro tapno magun-od dagiti benepisyo ken ayuda manipud iti gobyerno.
Daytoy ket paset iti agtultuloy a selebrasyon iti Ease of Doing Business (EODB) Month ita a bulan ti Mayo.
Imbalakad ti DA kadagiti mannalon, mangngalap, ken negoyante a kayat na ti agparehistro wenno ag-update iti RSBSA records a masapul nga itugot ti valid ID ken photocopy ti titulo, tax declaration ti daga a pagmulaan, wenno barangay certification.
Bayat a dagiti agaplikar para iti livestock ken poultry handler’s license ken FFEDIS registration ket masapul met nga agtugot ti business permit, TIN ken dadduma pay a kasapolan a dokumento.
Paset daytoy iti kampanya ti gobyerno a mapasayaat iti panagserbi iti publiko tapno ad-adda a maiyasideg ken epektibo dagiti serbisyo para iti sektor ti agrikultura.
