BR LA UNION – Naisayangkat idi kalman, Mayo 13, 2026 ti turnover ceremony kadagiti 100 initial reef buds para iti “Save Our Reefs” Project iti Taboc-Ili Norte Marine Protected Area idiay San Juan, La Union.
Babaen ti suporta dagiti pribado a grupo ken kumpanya ken ti Lokal a Gobierno ti San Juan, naiyuswat ti nasao a proyekto nga addaan tarigagay a salakniban ken i-preserba ti marine resources ken coral reefs iti kabaybayan.
Nakitinnulong iti turnover ceremony dagiti opisyal ti LGU San Juan nga indaulwan ni Mayor Mariquita P. Ortega ken dagiti opisyal ti Brgy. Ili Norte a nangipakita ti suporta iti proyekto para iti aglawlaw.
Segun kadagiti organizer, iti panangimuntar dagiti reef buds ket paset ti agtultuloy a panangiyalikaka iti kabaybayan ken panangsuporta iti pagbibiagan iti komunidad iti kabaybayan.
Namnamaen a makatulong daytoy a proyekto iti panangmantinar ti marine resources iti baybay ken mapapigsa ti pannakaammo ti publiko seknan iti kinapateg ti panangtaripato iti kabaybayan.
