Kalpasan ti innem nga aldaw nga imbestigasyon ti Philippine National Police (PNP), Department of Justice (DOJ), ken Department of the Interior and Local Government (DILG) ket indatagen ti Malacañang Palace iti timeline wenno oras, kasta met dagiti CCTV footages mainaig ti pammaltog idiay uneg ti Senado idi Mayo 13.
Segun kenni Interior and Local Government Secretary Jonvic Remulla, napateg kadagiti ebidensiya ken ti CCTV footage a saan a rinaut ti National Bureau of Investigation (NBI) iti Senado tapno arestaren ni Senador Ronald dela Rosa.
Kinunana nga awan iti imet a tactical gear, breaching equipment, shields, wenno assault devices dagiti ahente ti NBI idi nagturong da iti pasdek.
Nu ketdi, madlawan a naka-full battle gear dagiti kameng ti Office of the Senate Sergeant-at-Arms, babaen iti liderato ni retired Police Major General Mao Aplasca sakbay iti napasamak a pammaltog.
Innayon ni Remulla a nangipaulog ni Aplasca iti “lock-and-load” order sakbay ti insidente.
Kabayatanna, naballaagan met ti Senate maintenance management a patibkeren ken iserra dagiti arwangan iti Government Service Insurance System (GSIS) building kas panagannad iti posible a tensyon mainaig iti panagtalinaed ni Senador Dela Rosa iti idiay Senado.
Karaman pay iti timeline nga inruar ti DILG ken PNP ket ti lugan a posible nga inusar ti Senador manipud iti Senate protective custody idi parbangon ti Mayo 14.
Ti kotse nga addaan ti plaka nga “DAV 1225” ket nakarehistro kenni Senador Robinhood Padilla.
Pinasingkedan pay ni Remulla a naipadanon dan kenni Presidente Ferdinand Marcos Jr. ti mainaig iti insidente, ngem awan pay agingga iti agdama iti direktiba manipud iti Chief Executive.
Mainaig kadaitoy ket insubmitir metten ti DOJ dagiti nagun-od da nga ebidensya.
