BR LA UNION – Impakita ti Philippine Institute of Volcanology and Seismology (PHIVOLCS) iti video footage seknan iti panagayos ti lava ken panagtudo iti volcanic materials iti Bulkan Mayon a nangigubway ti collapse-fed pyroclastic density currents (PDCs) idi rabii ti Domingo, Mayo 31, 2026.
Segun iti State volcanologists, ti nasao a lava effusion ket nailista manipud alas-6:55 agingga alas-6:57 ti rabii, maibasar iti footage.
Sakbay daytoy ket impadamag ti ahensya a maysa a PDC event ti napasamak met laeng iti nasao a bulkan idi malem kalman, a nagayos iti nasurok kumurang a 2,000 metro idiay Mi-isi Gully.
Innayon pay ti PHIVOLCS, iti pyroclastic density currents ket nakairwar ti kulay-dapo nga asok nga umabot ti agingga 1,800 metro above mean sea level sakbay a nagayos a nagturong iti daya amianan-a-daya.
Iti kauddian a datos dagiti State volcanologists, addan iti maika-146 a nagsasaruno nga aldaw iti effusive eruption ti Mayon Volcano, nga agtultuloy a mangigubgubway ti panagayos ti lava, pyroclastic density currents wenno “uson,” ken rockfalls.
Agtaltalinaed a nakangato iti Alert Level 3 ti bulkan mayon, nga indikasyon ti intensified unrest wenno agtultuloy a panaggaraw ti magma, bayat a nairut a maipawil a sumrek iti innem a kilometro a Permanent Danger Zone (PDZ) gaputi pangta ti banta a bumtak ti bulkan ken peligro a volcanic activity.
