BR LA UNION – Idaulwan ti gobyerno probinsiyal ti La Union iti maisayangkat a Trabaho Agad Job Fair inton bigat, Hunyo 12, 2026 kas paset iti panang-selebrar ti maika-128 nga Independence Day ditoy Pilipinas.
Maisayangkat ti aktibidad iti maikadwa a kadsaaran ti SM City La Union.
Iyal-allokoy ti lokal a gobyerno kadagiti amin nga agsap-sapol ti trabaho ditoy probinsiya a makipaset iti nasao nga aktibidad.
Namnamaen a makipaset iti job fair dagiti maseknan nga ahensiya ti gobyerno, naduma-duma a kumpanya ken pribado nga employers a posible a mangisayangkat ti on-the-spot hiring.
Babaen iti nasao nga aktibidad ket mapalawa pay ti gobyerno probinsiyal iti livelihood opportunities ken makatulong tapno makissayan ti unemployment rate ditoy probinsiya.
Mabalakadan dagiti aplikante nga isagana iti updated resume, biodata, ken dadduma pay a kasapolan a dokumento ken isagana ti bagi para kadagiti posible nga on-the-spot interviews ken hiring processes nga aramiden dagiti makipaset a kompanya ken ahensiya.
