BR LA UNION – Nangisayangkat ti “stop and salute flag raising ceremony,” dagiti kameng ti gobyerno iti intero a pagilian.
Segun kenni Eufemio O. Agbayani III, Historic Sites Development Officer II ti National Historical Commission of the Philippines (NHCP), paset daytoy kadagiti aktibidad iti panagrugi ti National Flag Days ita nga aldaw, Mayo 28, 2025.
Iti selebrasyon ket pananglagip iti panagballaygi ti Pilipinas iti nabirngasan a “Battle of Alapan” kalpasan a pinarmek ti tropa dagiti Filipino, nga indaulwan ni Gen. Emilio Aguinaldo, iti pwersa dagiti Kastila.
Para kenni Agbayani, senyales daytoy iti panagrugi dagiti programa sakbay ti Independence Day inton Hunyo 12.
Kinuna ni Agbayani iti Bombo Radyo “Nu iti Paskua ket addaan ti simbang gabi, addaan met ti National Flag Days ti Independence Day.”
Kabayatanna, malaksid kadagiti pasamak ita nga alaw, tuloy-tuloy ti dadduma pay nga aktibidad iti uneg ken ruar ti Metro Manila, agingga a madanon ti Aldaw ti Panagway-wayas.
