BR LA UNION – Nagballaag ni Senator Panfilo “Ping” Lacson a posible nga agbanag iti maysa a constitutional crisis iti impeachment trial ni Vice President Sara Duterte nu adda panagkurang ti bilang dagiti senator-judges gaputi posible a preventive suspension wenno pannakadetine ti sumagmamano a senador seknan iti imbestigasyon iti maipagarop nga iregularidad kadagiti proyekto a flood control.
Gaputi dayta, insingasing ni Lacson nga adalen iti posibilidad a palubosan nga akmen dagiti suspendido wenno nakadetine a senador iti pagrebbengan da kas senator-judges iti impeachment court, laksid a temporary a saan da a makapagtrabaho kas mammanday linteg.
Inlawlawag na a nu ingkaso ket umabot iti siyam a senador iti masuspinde wenno mabalud, 15 laengen iti mabati a miyembro ti impeachment court.
Iti sidong ti Konstitusyon, kasapolan ti botos a 2/3 iti amin a senador, wenno 16 a botos, tapno makedngan ti maysa nga opisyal iti impeachment proceedings.
Segun kenni Lacson, nu ipalubos ti pagukuman, mabalin a dumar-ay iti panagdengngeg dagiti nakadetine a senador iti sidong ti nairut a panagbantay dagiti kameng ti Bureau of Jail Management and Penology (BJMP).
Maysa pay a makitkita nga opsyon ti senador iti temporaryo a pannakaitantan ti impeachment trial agingga agtapos ti 90-nga aldaw a preventive suspension dagiti suspendido a senador.
Kinuna na a napateg a pagtungtongan a dagus dagiti nasao a posibilidad tapno maaddaan ti naan-anay a panawen dagiti legal nga eksperto nga amirisen dagiti implikasyon na sakbay a mapasamak iti nasao a sitwasyon.
Kabayatanna, tinubngar ni Lacson iti waragawag ni sigud a Senate President Alan Peter Cayetano a mabalin nga ibaba iti 12 iti kasapolan a bilang ti botos para iti conviction wenno acquittal iti impeachment trial.
Impaganetget ti senador a nalawag nga itudtuding ti Konstitusyon a kasapolan iti botos a two thirds iti amin a miyembro ti Senado tapno makedngan iti maysa nga opisyal a mausig iti impeachment court.
