BR LA UNION – Nainget a pinaglibakan ni Senator Francis ”Kiko” Pangilinan dagiti alegasyon a pannakairamanna nga immawat ti maleta a naglaun ti kuwarta.
Daytoy ket kalpasan a rimwar iti maysa a press conference idi kalman, Martes, iti waragawag dagiti sigud a bodyguard ni sigud nga Ako Bicol party-list Rep. Zaldy Co, ken impakita da pay ti maysa a ladawan a maipagarop nga adda pakainaiganna kenni Pangilinan ken asawa na a ni Sharon Cuneta.
Iti waragawag na a napaulwan ti “Statement on Suitcases,” imbaga ti senador a bin-ig nga alegasyon laeng ken awan ti natibker nga ebidensya dagiti nasao nga akusasyon kadakuada.
Segun kenni Pangilinan, panggep laeng dagiti nasao nga akusasyon a dadaelen ti kredibilidad na, nangruna ket naipadamag nga isuna ti agtugaw kas chairperson ti Senate Blue Ribbon Subcommittee a mangimbestigar iti maipagarop a flood control scam.
Impaganetget pay ti senador, awan ti maipagarop nga anyaman nga ebidensya a mangiraman kenkuana kadagiti makunkuna a maleta ken mapukpukaw a pondo ti gobyerno.
Innayonna a nanayunan ti rurod na iti pannakairaman ti pamilya na iti isyu.
Gaputi dayta, nagballaag ni Pangilinan a mangidatag ti kaso kontra kadagiti adda ti likudan iti akusasyon.
Iti post na iti social media, nainget a kinondinar na dagti akusasyon ken inawaganna daytoy nga awanan ti basaran ken pammardaya laeng.
