Dinepensaan ni House Majority Leader Representative Sandro Marcos iti bersyon ti Anti-Political Dynasty Bill nga impasa ti Kamara iti kangitingitan dagiti kritisismo a nakapsot daitoy ken arig na salsalakniban na dagiti political dynasties imbes a lapdan ti dagitoy.
Segun kenni Marcos, ti bersyon a pinatibker ti Kamara, saan man nga isu ti kayat dagiti nangilungalong, daitoy met iti nakagun-od ti kadakkelan a suporta manipud kadagiti mamanday-linteg.
Kinunana a saan pay met a pinal ti gakat agsipud ta dumalan pay daitoy iti Bicameral Conference Committee, nu sadinno ket posible a dagiti panagbalbaliw a saan a maitunos iti bersyon ti Senado.
Babaen ti bersyon iti Kamara, mapawilanen nga aggiddan nga agkandidato wenno mangiggem ti posisyon iti maymaysa a lokalidad dagiti agkakabagian ti agingga second degree of consanguinity or affinity.
Pakairamanan ditoy ket dagiti agassawa, agkabsat, nagannak ken annak, kasta met dagiti lilong, lilang, ken uray kadagiti apo.
