Naan-anayen nga imbasura ti Sandiganbayan dagiti dua a nagsina a kaso to gobierno a mangkamkamat kadagiti ill-gotten wealth ken coco levy funds ti pamilya Marcos ken Romualdez, kasaruno iti rason a napalaos a pannakatantan ti panagdengngeg ken ti teknikal a rason.
Manipud iti impaulog a resolusyon ti Second Division ti anti-graft court, pinaboran na da sigud a Presidente Ferdinand Marcos Senior, sigud a First Lady Imelda Marcos, ken Juan Ponce Enrile iti 1987 civil case.
Naibasura dagitoy gapo iti inordinate delay, nu sadinno ket impaganetget ti korte nga ti aganay 40 a tawen a panagdengngeg ket direkta a naglabsing iti karbengan dagiti akusado iti napartak a panagdengngeg.
Naibasura payen ti apela ti Presidential Commission on Good Government (PCGG) a luktan manen ti kaso.
Pimmabor dagiti mahistrado iti argumento ti depensa a nakompromison ti kabaelan da a mangisakit gapo iti pannakapukaw dagiti ebidensya ken panagpusay dagiti agserbi a witnesses iti panaglabas ti panawen.
Nupay kasta ket inlawlawag met ti korte a matuloy latta ti panagdengngeg kadagiti nabatbati pay a kaskaso.
Kabayatanna, iti naisina met a desisyon ti Sixth Division ket naibasura metlaeng ti kaso iti panagkumpiskar ti nasurok $5M a saan a mailawlawawg a baknang ti pimmusayen a sigud a Leyte Governor Benjamin Kokoy Romualdez kasta met ti asawa na.
Imbasar ti korte ti desisyon iti prinsipyo ti judicial stability wenno non-interference, nu sadinno ket saanen a mabalin pay a pakibyangan ti Sixth Division ti immun-una a pammilin ti Fourth Division a nangwaswas ti nasao a pondo idi napalabas a tawen.
Ibilbilang payen ti korte iti napaot a pannakatantan ti kaso kas indikasyon ti naan-anay a panag-abandonar ti estado iti panagkamat kadaitoy.
Ni Kokoy Romualdez ket direkta a kasinsin ni Imelda Marcos ken dagiti dua a naibasura a kaso ket paset laeng ti serye dagiti legal nga addang ti gobierno tapno mababawi dagiti binilyon a piso a pondo a mapapati a nataktakaw iti sidong ti administrasyon da.
