Nagpalagip iti Police Regional Office 1 (PRO 1) tapno maliklikan iti smishing scam, maysa a porma ti panangallilaw babaen kadagiti peke nga SMS wenno text message a mausar dagiti manloloko tapno maala dagiti personal nga impormasion, bank details, ken one-time password (OTP) dagiti biktima.
Segun iti PRO 1, iti smishing ket maysa a text-based scam a mangallilaw kadagiti tattao babaen ti panangipatulod dagiti kasla lehitimo a mensahe. Kadagitoy a mensahe, maikabil kadawyan dagiti link a mangiturong iti peke a website a mangala kadagiti sensitibo nga impormasion ken detalye ti online banking account.
Tapno maliklikan iti panagbalin a biktima ti scam, pinalagipan ti PRO 1 iti publiko a saan a sumungbat kadagiti kahina-hinala a text messages ken saan a mangited ti aniaman a personal nga impormasion, pakairamanan dagiti identification documents ken sabali pay a sensitibo a datos.
Imbilin pay dagiti otoridad a liklikan iti panang-click kadagiti link a nairaman iti kasta a mensahe gapu ta mabalin a mangiturong daytoy iti peke a website iti internet a mangkompromiso kadagiti bank account ken personal nga impormasion dagiti agar-aramat.
Kabayatanna, palagip ti PRO 1 iti publiko a dagus nga i-report iti telecommunication provider wenno kadagiti mayannatop nga ahensia ti gobyerno no adda matakuatanda a kahina-hinala wenno makapaallilaw a komunikasion.
Mensahe dagiti otoridad a masapul a kanayon a naannad ken alisto dagiti umili iti panangusisa kadagiti maaw-awatda a mensahe tapno masalakniban dagiti personal ken pinansial a datos manipud kadagiti cybercriminal. (Report by Bombo Jordan Colcol)
