BR LA UNION – Nagpakdaar manen iti Police Regional Office 1 (PRO 1) iti publiko seknan ti agtultuloy a panagraira iti smishing scam iti rehiyon uno.
Segun iti PRO 1, iti smishing scam ket maysa a kita ti peke a text-based scam a mangallilaw iti tattao babaen ti panangipatulod iti nasayaat ngem peke a mensahe tapno maala dagiti personal nga impormasyon, bank details, ken one-time password (OTP) dagiti biktima.
Masansan a mapakuyogan dagiti manangallilaw a text message iti link a mangiturong iti peke a website, tapno maala dagiti sensitibo nga impormasyon ken detalye ti online banking account.
Balakad dagiti otoridad, saan a tutupan dagiti mapagdudua-an a mensahe a maaw-awat iti smartphone, saan a mangipaay ti anyaman a personal nga impormasyon, partikular dagiti identification documents ken dadduma pay a sensitibo a datos.
Imbilin pay dagiti otoridad a liklikan nga i-click dagiti link a naipakuyog iti mensahe gaputa mabalin a mangiturong daytoy iti peke a website iti internet a mangikompromiso kadagiti bank account ken personal nga impormasyon.
Kabayatanna, imbalakad ti PRO 1 iti publiko a dagus nga i-report iti telecommunication provider wenno kadagiti maseknan nga ahensiya ti gobyerno, nu maka-engkuwentro iti mapagdudua-an ken maka-allilaw a mensahe ken komunikasyon manipud kadagiti cybercriminal.
