Natalged a nakasubli ditoy Pilipinas ti maikadua a batch ti 18 a repatriated a Pilipino manipud iti Russian Federation kalpasan ti dandani siam a bulan a pannakadetine.
Simmangpet ti grupo iti Ninoy Aquino International Airport (NAIA) Terminal 1 ita nga aldaw. Pasetda iti pakabuklan a 24 a Pilipino a nawayawayaan ken napaawid manipud Russia. Kadagiti 18 a simmangpet, 16 ti babbai ken dua ti lallaki.
Pinasangbay ida dagiti pannakabagi ti Department of Migrant Workers (DMW), nga idauluan ni Secretary Hans Leo J. Cacdac, agraman ti Department of Foreign Affairs (DFA), Overseas Workers Welfare Administration (OWWA), ken dadduma pay a partner government agencies.
Segun kenni Secretary Cacdac, personal a maseknan ni Presidente Ferdinand R. Marcos Jr. iti kasasaad dagiti OFW idiay Russia ken inramanna ti nasao a banag iti bilateral talks da kenni Russian President Vladimir Putin.
Imbaga met ni Cacdac nga agtultuloy iti suporta ti gobierno kadagiti repatriated OFW babaen ti reintegration assistance ken panangigiya para iti natalged ken legal a panagtrabaho iti sabali a pagilian, maitunos iti direktiba ti Presidente.
Maipasidong met iti imbestigasion dagiti repatriated Filipinos tapno maamwan no adda ti napasamak nga illegal recruitment wenno human trafficking nga adda pakainaigan na iti panagturong da idiay Russia.
Inpasigurado ti DMW ken OWWA iti agtultuloy a panangipaay ti transportasion paawid kadagiti probinsiya da, temporaryo a pagdagusan no kasapulan, financial assistance, legal guidance, ken dadduma pay a post-repatriation support karaman iti training, livelihood, ken employment assistance.###
