SWITZERLAND — Agtultuloy iti negosasion iti nagbaetan ti Estados Unidos ken Iran idiay Switzerland, ken namnamaen ti US delegation nga agtrabaho da agingga iti agpatnag tapno maitandudo dagiti saritaan.
Kenuna ti maysa a nangato a diplomat ti Estados Unidos a makumikom ni Vice President JD Vance ken ti sibubukel a delegasion ti Estados Unidos iti agtultuloy a panagtaripnong ken negosasion kadua dagiti nangibagi ti Iran.
Segun iti opidial, karaman kadagiti kangrunaan a natalantan a saritaan iti panangilawlawag iti mensahe ti Iran seknan iti Strait of Hormuz, maysa a napateg a ruta pangbaybay para iti sangalubongan a kalakalan ti langis.
Panggep met ti agsumbangir a dasig a mangbukel dagiti mekanismo tapno masigurado nga agtalinaed a silulukat ken natalged iti nasao a dalan.
Malaksid ditoy, napagsaritaan dagiti addang tapno maiwasan dagiti saan a ninamnama nga insidente iti rehiyon ken iti panangipatungpal ti agdama a ceasefire idiay Southern Lebanon.
Kabayatanna, inbaga met ti diplomat a naaddaan ti naan-anay ken nauneg a diskusion maipapan iti amin nga aspeto ti posible a nuclear deal iti nagbaetan ti Estados Unidos ken Iran. Panggep daytoy a makabukel ti inisial a balangkas para kadagiti teknikal a saritaan a sumaruno nga isayangkat ti agsumbangir a dasig.
Agtultuloy a banbantayan ti internasional a komunidad iti resulta dagiti negosasion, a mabalin a maaddaan ti dakkel nga epekto iti seguridad ken kinatibker ti Middle East.###
