BR LA UNION – Inaprubaran ti International Criminal Court (ICC) Trial Chamber III iti panang-freeze iti kuwarta a nakumpiskar kenni sigud a Presidente Rodrigo Duterte idi naarestar ken naipasidong iti kustodiya ti international tribunal idi Marso 2025.
Daytoy ket kalpasan a kiniddaw ti prosekusyon a ma-access dagiti personal nga arwaten ken i-freeze ti anyaman a kuwarta nga imet ti sigud a presidente.
Maibasar kadagiti dokumento nga inruar ti ICC idi Biyernes, Hunyo 27, 2026, pinaboran ti korte iti mosyon ti prosekusyon nga ituloy ti panang-freeze ti anyaman a kantidad a naala kenni Duterte idi panawen a naarestar daytoy.
Immunan a kwinestiyon ti kampo ni Duterte ti nasao nga addang ti Trial Chamber III.
Segun iti depensa, saanen a kasapolan nga aramiden ti prosekusyon ti nasao a kadawatan agsipudta addan iti kustodiya ti ICC Registry iti nasao a kuwarta.
Impaganetget da pay nga awan ti agbalin nga epekto daytoy iti agdama a panagdengngeg ti kaso.
Saan metten nga imbaga ti ICC nu mano iti kuwarta a nakumpiskar da iti sigud a presidente.
