BR LA UNION – Inyuswat ni President Ferdinand Marcos Jr. iti maysa a baro a digital platform, nga addaan tarigagay nga aramiden a silulukat, nalaka a ma-access, ken accountable iti publiko ti amin a pondo a gasgastosen ti gobyerno.
Ti baro a sistema ket maawagan a Centralized Open Monitoring Platform for Appropriations and Spending Statistics wenno DBM COMPASS a binukel ti Department of Budget and Management.
Kagiddan daytoy, indaulwan ti Presidente iti panangpatibker ti updated Philippine Public Financial Management Reform Roadmap 2024–2028 tapno lalo a mapapigsa iti panangimaton ti kuwarta ti pagilian.
Segun kenni Presidente Marcos, ti kuwarta ti ili ket para iti ili isunga karbengan ti tunggal Pilipino a makita ken mabantayan nu pakaus-usaran iti ibaybayad a buwis.
Babaen ti DBM COMPASS, maaddaan ti publiko ti maysa nga online portal a naglaun kadagiti interactive charts tapno nalaka a sapolen dagiti badyet, obligasyon, ken aktuwal a kuwarta nga irwar ti tunggal ahensya ken rehiyon.
Imbaga ti Chief Executive a ti naurnos a panangimaton iti pondo ket adda direkta nga epekto na iti napaspas a panagipasdek iti pagadalan, ospital, tulong kadagiti mannalon ken mangngalap, ken panangipatungpal dagiti proyekto uray kadagiti adayu a lugar.
Impaganetget pay ni Presidente Marcos a pinalawa pay ti gobyerno iti Project DIME nga agus-usar iti satellite tapno mabantayan dagiti imprastraktura ditoy pagilian.
Binilin ti Presidente iti amin nga ahensya ti gobyerno nga ilinteg iti badyet kadagiti kangrunaan a prayoridad ti pagilian ken urnosen iti panag-report ken panagbantay kadagiti proyekto.
