BR LA UNION – Natay ti maysa a 33-anyos a lalaki kalpasan a nalmes gaputi napegges nga ayus ti danum iti Karayan Balili idiay Purok 1, Barangay Nagrebcan, Bauang, La Union, idi Hunyo 30, 2026.
Nabigbig ti biktima kas maysa a person with disability (PWD), ken residente ti Barangay Central West, Bauang.
Maibasar iti imbestigasyon ti Bauang Municipal Police Station, agarup alas 9:30 ti bigat, maipagarop a nakiin-inum ti biktima iti bayaw-na iti balayda idiay Barangay Nagrebcan.
Kalpasanna, nagturong ti biktima iti Karayan Balili kaduana ti 12-anyos a kaanakanna tapno agdigos.
Maibasar iti report, binalakadan ti kaanakanna nga agawiden, ngem maipagarop nga impilitna ti bumallasiw iti karayan agarup 25 a metro ti kaadayu na manipud iti igid.
Bayat ti kaadda ti biktima iti tengnga ti karayan, kellaat a nagpukaw daytoy ken mapapati nga inyanod ti napigsa nga ayus ti danum, malaksid pay a nakainom ti arak.
Dagus a nangisayangkat dagiti personnel ti Bauang Municipal Police Station, Bureau of Fire Protection (BFP) Bauang, Municipal Disaster Risk Reduction and Management Office (MDRRMO), agraman dagiti opisyal ti barangay iti search and rescue operation.
Kalpasan ti nasurok maysa nga oras a panagsapol, ballaygi a narekobre dagiti otoridad iti biktima ngem maysan a bangkay.
Indeklara ti duty physician ti Rural Health Unit (RHU) a natayen ti biktima.
Maibasar iti resulta ti medical examination, awan ti nakita a senyales ti foul play wenno aniaman a sugat iti bagina.
