Nasurok a 36.5 a tonelada a basura iti nakolekta ti Metropolitan Manila Development Authority (MMDA) kalpasan ti dua nga aldaw a rali ti Iglesia ni Cristo (INC) iti igid ti EDSA–White Plains Avenue idiay Siyudad ti Quezon.
Segun ti MMDA, agtultuloy iti cleanup operations, pakairamanan ti pannakatarimaan dagiti kongkreto a barrier, pannakaikkat dagiti debris ken pannakaakop dagiti nabati a basura tapno maisubli iti urnos ken masigurado ti kinatalged dagiti motorista ken pedestrian.
Kabayatanna, nayakar iti maikatlo nga aldaw ti rali iti Liwasang Bonifacio idiay Manila kalpasan nga inbabawi ti gobierno ti Quezon City ti permit para iti panagtitipon iti White Plains Avenue.
Maibasar iti rekord dagiti otoridad, nasurok a 15,000 ti timmabuno iti umuna nga aldaw ti rali, idinto a mapattapatta a 3,500 ti timmabuno iti maikadua nga aldaw.###
