Pinasingkedan ni Associate Justice Karl Miranda ti Sandiganbayan Third Division iti pannakaipaulog ti arrest warrant kontra kenni Senador Rodante Marcoleta.
Mainaig ti nasao a warrant iti kaso a plunder nga inpila ti Office of the Ombudsman idi napan a lawas, no sadino maak-akusaran ti senador a saan nga indeklara ti ₱75 million a campaign donations iti Statement of Contributions and Expenditures (SOCE) ken Statement of Assets, Liabilities, and Net Worth (SALN).
Karaman kadagiti napilaan di kaso iti sigud a kongresista a ni Michael Defensor ken dagiti negosiante nga isuda Joseph Espiritu ken Aristotle Viray, a sumangsango met iti panaglabsing iti Presidential Decree No. 46, a mangiparparit kadagiti opisial ti gobierno nga umawat iti regalo wenno donasion mainaig iti trabahoda.
Ti kangrunaan a kaso ket nai-raffle iti Sandiganbayan Third Division nga indauluan ni Justice Miranda, bayat a dagiti dadduma pay a mainaig a kaso ket naiwaras kadagiti dadduma a dibision ti korte.
Impaganetget ni Justice Miranda nga iti pannakaipaulog ti arrest warrant ket pammaneknek iti determinasion ti korte a mangipatungpal iti linteg ken pagsungbaten dagiti opisial a naakusaran ti kurapsion.
Gapu ta iti plunder ket maysa a non-bailable offense, manamnama a mangrugin iti nainget a panagusig a mabalin a maysa kadagiti kabaraan a legal a laban iti pakasaritaan ti Sandiganbayan.
Kabayatanna, nainget a pinaglibakan ni Marcoleta dagiti alegasion.
Tinakderanna nga isu ket biktima ti political persecution ti administrasion, banag a kinontra ti Malacañang.###
