BR LA UNION – Insalbar iti Deployable Response Team (DRT) ti Coast Guard Station (CGS) Iloilo kadwa da dagiti kameng ti Bantay Dagat dagiti 14 a crew pakairamanan ti boat captain, a naglugan iti distressed motorbanca, asideg iti isla ti Punta Buri ken Marbuena idiay Ajuy, Iloilo itay bigat, Hulyo 11, 2026.
Naggapo dagitoy idiay Punta Buri ken agturong da koma idiay Barangay Mangorocoro, Ajuy, Iloilo.
Maibasar iti report, nagsardeng ti panagandar ti nasao a motorbanca kalpasan a nadadael ti propeller daytoy, a gapwanan iti napipigsa nga angin ken dadakkel a dalluyon, epekto ti dakes a panawen.
Nai-report ti distressed motorbanca kadagiti otoridad babaen ti maysa a concerned citizen.
Nagbalin a natalged amin dagiti na-rescue nga indibiduwal ken in-turnover ti response team iti Municipal Disaster Risk Reduction and Management Office (MDRRMO) idiay Ajuy para iti medical assessment.
