BR LA UNION – Temporaryo nga inikkat ti Metropolitan Manila Development Authority (MMDA) iti clearing operations ni MMDA Special Operations Group-Task Force Road Clearing (SOG-TFRC) chief Gabriel Go, bayat a maisay-sayangkat ti imbestigasyon seknan iti maipagarop a pannakairaman na iti maysa a viral video.
Iti waragawag nga inruar ti MMDA ita nga aldaw ti Miyerkoles, Hulyo 15, imbaga ti ahensya a dimmanon kadakuada ti nagwaras a video a nakairamanan ni Go.
Ti nasao a video ket adda pakainaiganna iti maipagarop a wagas ti panangsita na iti maysa a lalaki a mangisursuro a nagmaneho ti motorsiklo nga awanan ti suot a helmet.
Segun iti MMDA, nakaawat da pay iti surat manipud naduma-duma a grupo, a mangkonkondinar iti napasamak kalpasan a maipagarop a naibabain iti social media ken aramiden a content iti natiliw a maestro bayat a nakasuot ti uniporme.
Imbaga ti ahensya a mangisay-sayangkat daytoy ti pormal nga imbestigasyon tapno maamwan nu adda sungsungbatan ni Go iti insidente.
Naiyisyuan metten ti show cause order a mangbil-bilin kenkuana nga agsumite ti palawag seknan iti insidente.
