BR LA UNION – Saan unay a nakaru iti nagbalin nga epekto ti bagyo Kiyapo kadagiti lugar a dinalananna iti Northern Luzon, segun ti Office of Civil Defense (OCD).
Daytoy ket laksid ti nagsasaruno a panagtudo a napakuyugan ti napigsa nga angin a gapwanan ti nasao a bagyo.
Iti interview ti Bombo Radyo kenni OCD Spokesperson, Junie Castillo, imbaga na a minimal laeng iti epekto ti bagyo, uray kadagiti lugar a naipasidong iti Tropical Cyclone Signal No. 2, bayat nga ibil-bilang ti dadduma a ‘beneficial’ ti tudo para kadagiti mannalon.
Nupay kasta, saan a mailibak kunana a mas nalawa iti epekto ti hanging habagat a pinapigsa ti bagyo Kiyapo, nangruna idiay Visayas ken Mindanao.
Kadagiti nasao a rehiyon, adda nasurok 30 a lugar a nakapadas iti nagsasaruno a panaglayos ken sumagmamano nga aldaw a naiyuper ti danum ti layos.
Kadagiti nasao a lugar, nasurok 27,000 a pamilya ti nadetermnina nga apektado.
Segun kenni Castillo, dakkel a tulong ti nasapa a deployment ken nairut a monitoring kadagiti lugar nga immuna a nadetermina a maapektaran ti bagyo, tapno mapagtalinaed a minimal ti epekto dagiti bagyo iti sadinuman a lugar.
Kinuna na a kanayon nga ipas-pasiguro ti administrasyon Marcos a sapaen ti deployment iti ground level ken irutan ti panagbantay kadagiti maibilang a risk areas tapno maliklikan iti casualties ken nakaru nga epekto iti sanikua ken pasilidad.
