BR LA UNION – Nasurok 21,000 a pulis iti imuntar ti Philippine National Police (PNP) kas paset ti seguridad para iti maikalima nga State of the Nation Address (SONA) ni President Ferdinand Marcos Jr. idiay Batasang Pambansa idiay Quezon City ita nga aldaw, Hulyo 27, 2026.
Segun kenni PNP Chief Police General Jose Melencio Nartatez Jr., nakumpleto dan iti security protocol ken maisay-sayangkat laengen iti phased deployment dagiti pulis kadagiti lugar nga agkasapolan ti mas nair-irut a panagbantay.
Kinuna pay ti PNP chief a nakasaganan ti organisasyon da tapno masiguro iti seguridad dagiti opisyal, bisita, ken publiko bayat ti pannakaisayangkat ti SONA.
Binalakadan na dagiti pulis a pagtalinaeden iti maximum tolerance iti panangipatungpal ti pagrebbengan da.
Kiniddaw na met kadagiti grupo a mangisayangkat ti protesta a makitinnulong kadagiti otoridad ken suruten iti ipatpatungpal nga allagaden dagiti otoridad tapno mapagtalinaed ti kinaurnos.
Segun pay iti PNP, awan ti namonitor da a seryoso a pangta iti seguridad nga adda pakainaiganna iti SONA.
Nupay kasta, agtalinaed a nakaalerto ti pulisiya tapno dagus nga agresponde iti anyaman a posible a riribok.
Naka-full alert status metten ti pulisiya idiay Metro Manila. Maipatungpal pay ti mas nair-irut a gun control measures iti PNP ita nga aldaw.
Kabayatanna, maipatungpal ti no-fly zone ken no-drone zone iti sumagmamano a lugar, kabilang iti aglawlaw ti Batasang Pambansa a pakaisayangkatan ti panagbetla ti Presidente.
Tallo a grupo ti impaayan ti pammalubos ti Quezon City government a mangisayangkat ti rally idiay Commonwealth Avenue: iti Bagong Alyansang Makabayan, Sanlakas, ken Better Brighter.
Nagpanawagan iti PNP kadagiti organizer dagiti protesta a bantayan ti grupo da kontra kadagiti posible a mangriribok.
Immandar pay ti PNP chief iti amin a pulis a nadutokan nga agbantay ti seguridad iti SONA nga agusar ti body-worn cameras ken dadduma pay a recording equipment tapno masiguro nga agbalin a transparent iti operasyon.
