BR LA UNION – Innem pay a tripulante manipud iti limned a Vietnamese cargo vessel asideg iti Kagitingan Reef idiay West Philippine Sea (WPS) ti naisalbar.
Agtultuloy met ti search and rescue operations para kadagiti 17 pay a mapukpukaw a naglugan iti Vietnamese cargo vessel a Khoi Nguyen 18 a limned idi rabii ti Biyernes, Hulyo 25.
Segun iti Philippine Coast Guard (PCG), pakabuklan a 62 crew members ti nakalugan iti barko idi mapasamak ti insidente.
Dagus a nangisayangkat ti search and rescue operations iti Philippine Coast Guard, maiyannurot iti direktiba ni PCG Commandant Admiral Ronnie Gil Gavan.
Impatulod metten ti PCG ti BRP Malapascua ken maysa nga aircraft manipud Palawan tapno tumulong iti panagsapol dagiti mapukpukaw a tripulante.
Segun iti PCG, agtultuloy ti pannaki-koordinar da iti Vietnamese Coast Guard tapno makaala iti napapateg nga impormasyon a makatulong iti rescue operations.
Agus-usar dagiti otoridad iti Search and Rescue Optimal Planning System, maysa a teknolohiya a makatulong iti panangdetermina ti lokasyon dagiti mapukpukaw a tao tapno napartak ti panagsapol.
Kabayatanna, inpadamag met ti Chinese state media a ti rescue team ti China ti nangisalbar iti sumagmamano a Vietnamese a tripulante asideg iti aw-awagan da a Chinese-occupied reef.
