BR LA UNION – Naan-anay a nabukel kas bagyo ti Low Pressure Area (LPA) manipud daya ti Infanta, Quezon.
Naudi a nasaripatpatan ti sentro ti bagyo LUIS iti kaadayu a 360 km daya ti Daet, Camarines Norte, kabuyog ti angin nga agpigsa ti 45 km/h asideg iti sentro, ken kapegges a dumanon iti 55 km/h.
Dup-dupagenna iti palaud a direksiyon iti kapartak a 15 km/h.
Naipasidong iti Tropical Cyclone Wind Signal No. 1 dagiti sumaganad a lugar iti Luzon:
- Pollilo Islands
- Eastern portion ti Camarines Norte (Daet, Talisay, Paracale, Jose Panganiban, Capalonga, Vinzons)
- Northern portion ti Catanduanes (Pandan, Caramoran, Bagamanoc, Panganiban)
Makapadas ti narway a panagtudo ken napigsa nga angin dagiti nasao a lugar, kangrunaanna iti kabantayan ken asideg iti kabaybayan.
Maibasar iti forecast ti weather bureau, ti bagyo Luis ket bumuntog bayat nga agturong iti laud amianan-a-palaud agingga inton bigat sakbay nga agsikko iti daya amianan-a-padaya.
Iti forecast track, ti sentro ti bagyo LUIS ket agtalinaed iti Philippine Sea.
Nupay kasta, posible ti landfall scenario wenno umasideg iti Northern Luzon.
Agtalinaed a tropical depression ti bagyo Luis iti sumaganad a 24 nga oras.
Inton Lunes, Agosto 3, namnamaen a pumigsa ti bagyo iti Tropical Storm bayat ti panagturong na iti daya a kabaybayan ti Central Luzon.
Kalpasanna, makitkita ti in-inut a panagkapsot ti bagyo Luis agingga nga agbalin-to laengen a remnant low inton Miyerkoles, Agosto 5, 2026.
