BR LA UNION – Dumanonen iti walo ti bilang dagiti natay gapu iti panagreggaay ti daga idiay Barangay Guisad Surong siyudad ti Baguio, segun iti Baguio City Public Information Office.
Maibasar iti kaudian a report manipud iti City Public Information Office agingga alas 7:00 idi rabii, walo a tattao ti kumpirmadon a natay, bayat a tallo ti agtaltalinaed a mapukpukaw.
Dua a tattao ti naisalbar, idinto a maysa kadagiti tallo a nakalasat nga immuna a naiturong iti ospital ti naipadamag a natay gapu kadagiti sugat a sinagrapna.
Naisalakan met dagiti rescuers ti maysa nga aso manipud iti landslide area.
Agtultuloy ti search, rescue, ken retrieval operations iti nasao a lugar bayat a sapsapulen dagiti otoridad dagiti indibidual nga agtaltalinaed a missing.
Napasamak ti panagreggaay ti daga agarup alas 7:00 ti rabii idi Domingo, iti baet ti agtultuloy a napigsa a tudo iti siyudad.
Tallo a babbalay ti natamaan ti landslide a naka-apektaran ti lima a pamilya.
Segun kenni Baguio City Mayor Benjamin Magalong, naiyakaren dagiti residente nga agnanaed kadagiti asideg a lugar a maibilang a nangato ti risgo iti panagreggaay ti daga.
Kabayatanna, imbaga ti mayor a 13 pay a landslide ti nairekord met iti nadumaduma a paset ti Baguio City gapu iti agtultuloy a panagtudo.
Gapu iti dayta, umaboten iti 14 ti pakabuklan a bilang dagiti nairekord a landslide incidents iti siyudad.
Impakdaar ni Magalong a mabalin a manayunan pay ti bilang dagiti insidente, gapu iti agtultuloy nga epekto ti dakes a panawen.
