BR LA UNION – Pormalen a pinilaan ti kaso ti Department of Justice ni Bise Presidente Sara Duterte idi kalman, Agosto 11, 2026 agarup ala-una ti malem idiay Office of the Clerk of Court ti Quezon City Regional Trial Court.
Iti statement ni Justice Spokesperson Atty. Polo Martinez, pinasingkedanna ti panangipila ti departamento iti tallo a bilang ti kaso a ‘grave threats’ kontra iti bise presidente.
Nangrugi ti nasao a kaso idi pangtaan ti Bise Presidente ti biag da Presidente Ferdinand ‘Bongbong’ Marcos Jr, First Lady Liza Arenata-Marcos, ken sigud a House of Representatives Speaker Martin Romualdez.
Mapapati nga adda ti kinontrata ti Bise Presidente a ‘hitman’ a mangpapatay kadagiti nadakamat personalidad no kas bilang isuna ti umuna a mapatay.
Nupay kasta, imbasura ti DOJ ti reklamo nga Inciting to Sedition nga immunan nga inpila ti National Bureau of Investigation (NBI).
Kabayatanna, pinalagan ti kampo ti Bise Presidente babaen ti legal counsel manipud Chua Lim & Associates a ni Atty. Paul Lawrence Lim.
Segun kenni Atty. Paul Lawrence Lim, abogado ni VP Sara, namnamaen dan iti nasao nga addang ken nakasagana iti kampo da nga aramaten amin a legal a remedyo para kadagiti nasao a kaso.
Innayon pay ti abogado nga agtaltalinaed a presumed innocent ni VP Duterte ken mapapati a saan a mabalin a kaswan iti maysa nga impeachable officer para kadagiti alegasyon a sakop met laeng ti impeachment case, isunga mangnamnama ti kampo a maibasura met laeng dagiti naidatag a reklamo .
