BR LA UNION – Agdagup iti 8,436 a barangay iti intero a pagilian ti sumangsango iti pangta ti layus ken panagreggaay ti daga gapu iti agtultuloy a panagraira ti hanging habagat a mangipapaay ti narway a panagtudo.
Immadu pay ti bilang dagiti lugar a peligro iti landslide ken flashfloods, iti nasurok 3,600 a barangay ti nairekord idi kalman, Agosto 15.
Segun iti Department of Environment and Natural Resources – Mines and Geo-Sciences Bureau (DENR-MGB), nakabase daytoy iti 72-hour rainfall forecast ti state weather bureau ken iti impact ti nasao a forecast kadagiti flood prone ken landslide prone areas.
Region 1: 2,835
Region 2: 606
CAR: 624
NCR: 1,252
Region 3: 1,969
Region 4A: 765
Region 4B: 157
Region 5: 224
Region 6: 1
Region 13: 3
Nabalakadan dagiti umili kadagiti lugar a flood ken landslide prone areas nga agtalinaed nga alerto iti panagbalbaliw ti lebel ti layus.
Bantayan dagiti lugar nga asideg kadagiti karayan, bakras, ken dalan ti danum (kas kadagiti kanal ti panagayus ti danum).
Napalagipan pay dagitoy nga ireport wenno mangipaay ti pakaammo maipapan iti anyaman a pagilasinan ti panaggaraw ti daga, kellaat a panagngato ti lebel ti danum, wenno napuskol a deposito ti pitak gapu iti danum ti layus.
