BR LA UNION – Imbabawi ti sigud a suldado ken sigud a security aide ni dati nga Ako Bicol Party list Rep. Zaldy Co a ni Orly Guteza, iti immuna a testimonya na seknan iti maipagarop a panangitulod na ti minaleta a kuwarta iti balay ni sigud nga House Speaker Martin Romualdez.
Iti baro nga affidavit, imbaga na a pinilit da isuna nga ibaga a nagitulod ti riniwriw a kuwarta kenni Romualdez, kasukat ti maipagarop a kuwarta ken scholarship para kadagiti annak na.
Segun kenni Guteza, pinaayaban isuna da Senator Rodante Marcoleta ken sigud nga AnaKalusugan Party list Rep. Mike Defensor iti maysa a Japanese restaurant asideg idiay Senado, ken adda metten ti nakasagana nga affidavit daytoy.
Imbaga na a ti draft ti ibasa na nga affidavit ket maipagarop nga inaramid ti manugang ni Defensor a binigbigna laeng iti nagan a “Mark.”
Segun kenni Guteza, nakita na mismo nu kasatno a binasa ken sinimpa ni Marcoleta iti draft ti affidavit.
Maipalagip nga idi Setyembre 25, 2025, nagbalin a surprise witness ni Guteza iti Senate Blue Ribbon Committee hearing nga indaulwan idi ni Marcoleta.
Iti immuna a testimonya na, imbaga na a paset isuna ti security team ni Co a maipagarop a nangitulod ti minaleta a kuwarta para kenni Romualdez.
Ngem iti baro ita nga affidavit, imbaga ni Guteza a sakbay ti panagdengngeg ket maipagarop a pinalagipan isuna ni Marcoleta a saan a lumisi iti immuna nga affidavit daytoy.
Idi malpas ti hearing ken awna metten ti komunikasyon kadagiti tattao a nagkari kenkuana, imbaga ni Guteza a naamiris na nga inusaran da laeng daytoy.
Gaputi dayta, imbaga na nga ag agbab-babawi iti inaramid na ken kumidkiddaw ti pammakawan iti pamilya na.
Ti imbabawi a salaysay ni Guteza ket nagbalin a paset iti ebidensya nga ad-adalen ti Office of the Ombudsman para iti posible a maidatag a reklamo kontra kenni sigud nga Speaker Romualdez.
Kabayatanna, ur-urayen ti Office of the Ombudsman iti kopya ti baro nga affidavit ni Guteza sakbay a mangipaay ti komento.
Malaksid kenni Guteza, uppat pay a sigud a security aide ni Zaldy Co ti immunan a nangibabawi iti salaysay da kontra kenni Romualdez ken dadduma pay a personalidad.
Agtultuloy ti pannaki-koordinar ti Bombo Radyo tapno alan ti palawag da Sen. Marcoleta ken Defensor seknan dagiti alegasyon ni Guteza.
