Imbatad ni Interior and Local Government Secretary Jonvic Remulla a nakikoordinar kadagiti otoridad iti ama ti 15-anyos nga estudyante a responsable iti pammaltog sadiay Ateneo de Zamboanga University, nupay awan pay iti nadatag a pagsungbatan na iti insidente.
Maibasar kenni Remulla, maymaysa a naggaraw iti Grade 8 a suspek ken awan iti kadwa na nga aniaman a grupo a nagplano iti panagraut. Dua nga estudyante iti natay, pakairamanan ti suspek a nagpaltog iti bagbagi.
Inusar na iti suspek ti .40-caliber ken ti 9mm pistols a kukua iti ama, maysa a kameng iti Bureau of Customs (BOC).
Mainaig na ket inwaragawag ni Customs Commissioner Ariel Nepomuceno a nabati dagiti nasao a paltog iti lugan a nausar a pangtulod iti ubbing agturong iti pagadalan, a rason tapno maiyuneg daitoy campus.
Inlawlawag ni Remulla a ti piskalya iti agdesisyon nu adda iti pagsungbatan ti ama kas maibasar iti agraraira a linteg ken resulta iti imbestigasyon.
Kabayatanna, temporario paylaeng a na-relieve iti posisyon ti opisyal a kas district commander ti BOC Enforcement and Security Services sadiay Zamboanga Port bayat nga agtultuloy iti kaso.
