BR LA UNION – Limbesen iti 190 meters iti tukad ti danum idiay Angat Dam, kalpasan ti dandani tallo a lawas a panagtudtudo.
Maibasar iti August 22 report nga inruar ti state weather bureau, umaboten ti lebel ti danum idiay Angat iti 190.47 meters, dandani 40 meters a mas nangatngato nu ikumpara iti sigud a tukad na idi Hulyo nga umabot iti nasurok 150 meters.
Ti agdama a lebel ket sangapulo a metro a mas nangatngato nu ikumpara iti Minimum Operating Level (MOL) a 180.0 meters.
Maibilang pay laeng daytoy a ‘safe’ wenno natalged manipud kadagiti serye wenno kellaat a supply shortages.
Iti likudan daytoy, agtaltalinaed a mas nababbaba ti nasao a tukad manipud iti Normal High Water Level (NHWL) a 210 meters.
Segun iti weather bureau, nupay nagsardengen dagiti serye ti panagtudo iti watershed area ti Angat Dam, tuloy latta ti panagngato ti lebel ti danum iti napalabas a 24 oras a nanayunan ti dandani maysa a metro iti lebel daytoy.
Ti nasao a dam iti kangrunaan a supplier ti nadalus a danum iti Mega Manila ken irrigation water iti rinibu nga ektarya ti kataltalunan idiay Central Luzon.
