BR LA UNION – Irekrekomenda ni Presidential Adviser on Cordillera Affairs, Assistant Secretary Antonio Tabora iti panangusar ti tunneling method iti panagaramid kadagiti kalsada ditoy pagilian.
Gapu daytoy iti kaadu dagiti kalamidad a mapaspasamak ditoy Pilipinas kas dagiti bagyo ken panaglayos, a pakadadaelan dagiti kalsada.
Segun kenni Tabora, panawenen tapno ikonsidera ti gobyerno wenno sumrek iti panagusar ti tunneling method iti panagaramid ti
kalsada nangruna kadagiti kabantayan a rehiyon.
Mamati ti opisyal nga agbalin a dakkel a gin-awa daytoy kadagiti lugar a prone iti rain-induced damage, agsipudta basbassit iti maintenance a kasapolan kadagiti tunnel.
Kinuna na a daytoy a sistema iti maus-usaren iti sabali a pagilian a kas iti Japan ken South Korea, ken mabalin a tuladen ti gobyerno ti Pilipinas.
Kinuna na pay nga adda naan-anay a kabaelan ken teknolohiya ti pagilian tapno ipatungpal na iti nasao a sistema, ken mabalin pay ti kumiddaw ti Pilipinas ti kanayunan nga ammo manipud iti sabali a pagilian.
