Naarestar dagiti tallo nga indibidwal kalpasan iti entrapment operation mainaig iti mapapati nga ilegal a panaglako kadagiti subdivision lots idiay Sitio Sedras, Barangay Dulao, Aringay, La Union. Dagiti respondents ket isuda Leo Tabago Balbacal, Alicia Mae D. Lim, ken Jerry R. Gabriel.
Ti kaso ket adda pakainaiganna iti posible a panaglabsing ti Republic Act No. 9646, Sections 4 ken 5 iti Presidential Decree No. 957, ken kadagiti probisyon nga adda pakainaiganda iti Cybercrime Prevention Act of 2012.
Nangrugi iti imbestigasyon idi Hulyo 28, 2026, kasaruno a mapasingkedan dagiti online advertisements para kadagiti sanikua nga ilaklako ni Balbacal ti gatad a P120K/100sqm. Manipud iti beripikasyon idi Agosto 7 ket nagpaam-ammo da Balbacal ken Lim a kas lehitimo a sales agent wenno broker.
Napagtulagan dagiti operatiba ken dagiti suspek a magatang dagiti dua a lote para ti pakabuklan a 300sqm ti gatad a P300K para iti pinal a transaksyon ti petsa nga Agosto 17.
Maibasar ti beripikasyon iti regional housing authority, awanan iti Certificate of Registration ken License to Sell ti subdivision. Awanan metlaeng iti maiyannatop a professional registration kas real-estate broker wenno salesperson da Balbacal ken Lim.
Kabayatanna, ni met Gabriel iti nagpaam-ammo a makinkukua iti sanikua kasta met iti maysa a real-estate development company. Intudo na da Balbacal ken ni Lim a kas brokers wenno sales agents na.
Idi nakiddaw iti titulo ket tax declaration laeng iti naipakita na a dokumento ti 300-square-meter property, nu sadinno ken saan pay a kenkuana a nakanagan, ngem ketdi kada “Echanis Alicia and Russel and Eden.”
Iti mismo nga aldaw iti transaksyon idi Agosto 17 ket inaramat dagiti operatiba ti marked money a nalaokan ti boodle money. Kasaruno iti countersigning ti deed of absolute sale, nu sadinno ket senyales a nakumpleton ti transaksyon, naarestar metten da Balbacal, Lim, ken Gabriel.
Ad-adalen paylaeng dagiti otoridad ti pannakaaramat kadagiti online advertisements ken electronic communications iti transaksiyon.
Napateg met a malagip nga adda paylaeng iti inquest stage ti kaso ken saan pay a napanpaneknekan iti korte dagiti alegasyon. Addaan metlaeng dagiti respondents iti karbengan para iti ‘due process’ ken ‘presumption of innocence’ agingga saan a napanpaneknekan a nagbasol.
