BR LA UNION – Aganay 95 a tattao ti naipadamag a natay ken ginasut pay ti mapukpukaw kalpasan ti napasamak a massive flash flood iti nagbeddengan ti Nepal ken China idi Miyerkoles, Agosto 26, 2026.
Maibasar iti report, nag-collapse ti nabunton a pitak a napakuyugan ti batbato iti karayan iti Himalayan border ti Nepal ken Tibet, China, a nakaigapwan ti mala-higante a layos iti nasao a lugar.
Pagdan-danagan a ginasut a tattao pakairamanan dagiti 291 a turista dagiti mapukpukaw ken sumagmamano a miyembro ti security forces kalpasan nga inyanod ti layos iti outpost dagitoy.
Makita iti videos a dinosena a tattao ti nagtataray ken naiyanod iti border partikular idiay Gyirong county, ket pagdan-danagan dagiti otoridad nga adu pay ti natay ken nangparnuay daytoy ti massive destruction.
Nanggubway iti nalawa a panagpukaw ti suplay ti kuryente iti asideg a distrito kalpasan a madadael dagiti kangrunaan a kalsada, rangtay ken dagiti hydropower plant.
Iti agdama, maipatpatungpal ti nalawa a search and rescue operations iti Nepal Army kabinnulig ti emergency response team a nagusar ti helicopter ken specialized equipment.
Maibasar kadagiti opisyal a report, nagramot ti trahedya idi timmama ti magnitude 4.4 a gingined a nangigubway ti dakkel a panaglayos.
Naka-high alert iti amin a komunidad iti igid ti karayan bayat nga agtultuloy a banbantayan dagiti otoridad iti ayus ti danum manipud iti border.
Courtesy: JanaViews
