BR LA UNION – Inlawlawag ti defence team ni Bise Presidente Sara Duterte a ti pannakaipaulog ti arrest warrant mainaig iti kaso a grave threats a naipila kontra kenkuana ket saan a kayat a sawen a napaneknekan a guilty kadagiti alegasyon.
Segun kenni Atty. Justin Gular, deputy spokesperson ti defense team, ti warrant nga inruar ti Quezon City Regional Trial Court ket paset laeng ti naisina a kaso kriminal ken adayo iti makunkuna a finding of guilt kontra iti Bise Presidente.
Inkeddeng ti korte ti P120,000 a piyansa para iti tunggal maysa kadagiti tallo a kaso, idinto a nagkedked ni Gular nga agkomento no kasano a mabalin nga apektaran daytoy ti impeachment trial, agsipudta saan da nga irepresentar ni Duterte iti nadakamat a criminal proceedings.
Inwaragawag pay ni Gular nga agtaltalinaed a silulukat iti opsiyon a tumakder iti Bise Presidente kas bukod na a witness iti impeachment trial idiay Senado, laksid nga awan pay ti pinal a desisyon ti defense team seknan iti daytoy.
Innayon ti abogado, posible a kissayan ti defense team iti panawen ti panangilanad da ti depensa depende iti pigsa ken kalidad dagiti ebidensya nga idatag ti prosecution panel.
Kabayatanna, agtalinaed a nakapokus ti publiko ken ti legal team ti Bise Presidente kadagiti sumaruno nga addang nga aramiden ti agpada a Kongreso ken dagiti korte maipapan kadagiti isyu a sangsanguenna.
