BR LA UNION – Kiniddaw ti defense team ni sigud a presidente Rodrigo Duterte iti international Criminal Court (ICC) a kissayan dagiti ebidensya nga insumite ti prosekusyon, ken imbaga da a mabalin a makaapekto iti panagsagana da para iti panagusig.
Iti filing a naidatag idi Setyembre 25, imbaga ti lead defense counsel a ni Peter Haynes a ngimmato iti 978 porsiyento iti prosecution evidence, wenno manipud 5,275 items a nagbalin a 62,130 files wenno kaibatugan ti nasurok 320,000 a pinanid.
Segun iti depensa, umabot iti mapatta-patta a 16,000 nga oras tapno maamiris dagiti dokumento sakbay ti nakatuding a trial inton Nobyembre 30.
Kinuwestiyon pay ti depensa iti kalidad ken relevance ti sumagmamano a files, kabilang iti makunkuna a biddut a metadata, duplicate documents, saan a mabasa nga scans, nagsisina a pinanid ken dagiti dokumento a maipagarop nga awan ti direkta a pakainaigan iti 49 nga insidente a sakop ti kaso.
Partikular a dinakamat ti depensa iti maysa a dataset nga addaan ti 44,400 items a naglaun ti maipagarop nga impormasyon seknan iti nasurok 20,000 drug-related deaths.
Inakusaran da pay ti office of the prosecutor a nagusar ti automated AI-generated summaries iti panangiproseso ti sumagmamano a files, maysa a waragawag a paset ti argumento ti depensa iti mosyon.
Tapno maliklikan a maitantan ti trial, insingasing ti depensa a mangaramid iti prosekusyon ti baro a case file a saan a lumbes iti 10,000 properly reviewed items, kabilang iti relevant, verified ken non-duplicative evidence ken dagiti materyal a mabalin a pabor kenni Duterte.
Manamnama a desisyunan ti Trial Chamber III iti mosyon iti sumaganad nga aldaw.
