CITY OF SAN FERNANDO, LA UNION – Nangisayangkat iti protesta idi kalman, malem ti Miyerkules, iti progresibo a grupo a La Union Peace and Justice Advocates idiay Petron-Sevilla Branch, City of San Fernando, La Union, a kas suporta ti national transport strike.
Segun kenni Niño Oconer, Secretary General iti grupo, nupay adda iti kallabes a rollback kadagiti produkto a petrolyo ket saan met latta nga umdas daitoy tapno marikna dagiti kaadwan a sektor.
Impaganetget ni Oconer a ti panagngato iti presyo ti krudo ket addaan iti domino effect kadagiti agbalin a gatad ti produkto ken serbisyo, nga inton agangay ket maipasa metlaeng kadagiti konyumer.
Napili iti Petron a kas lugar a nangisayangkatan da iti protesta, agsipud ta segun iti grupo, nakailista ti kompanya ti nasurok ₱15.6B a net income idi napalabas a tawen.
Nagpanawagan da pay a nu mabalbalin ket maikkaten iti 12% Value-added Tax ken excise tax iti lana, ken impaganetget iti pakasaritaan ti Petron a sigud a kukua iti gobierno sakbay a nailako ti pribado a sektor.
Para iti La Union Peace and Justice Advocates, kasapulan iti ad-adda a konkreto nga addang tapno mapababa iti presyo ti langis tapno malag-anan dagiti umili, nangruna dagiti adda iti sektor ti transportasyon. | Bombo Rafael Galano
