Naiserbin iti dismissal order kontra kada Urdaneta City Mayor Julio Parayno III, Vice Mayor Jimmy Parayno, ken innem pay a konsehales kasaruno iti panangiruar ti Office of the Ombudsman ti 21-a-pinanid a consolidated decision ti administratibo a kaso kontra kadakuada.
Napanekekan nga adda pagsungbatan nga administratibo ti kaso a Grave Misconduct da Mayor Parayno III ken Vice Mayor Parayno, bayat a Gross Neglect of Duty met iti naipaulog kadagiti innem a konsehal nga isuda Franco Paolo San Juan Del Prado, Warren Dela Cruz Andrada, Aurelio Agsalud, Franklin Villanueva, Jhan Hero Sumera, ken Alfonso Miguel Manuel Del Prado.
Malaksid iti pannakaikkat iti serbisyo, tungpal-biag da payen a diskwalipikado iti panagiggem ti aniaman a pampubliko a posisyonm kasta met a kaselado’n iti civil service eligibility da ken ti karbengan da para kadagiti retirement benefits.
Kabayatanna, nagsapata metten iti bukod da a posisyon da Blesildo Sumera ken Rio Virgilio Esteves kas baro a Mayor ken Bise Mayor ti Urdaneta City.
Nakaragsakan met iti sigud nga Konsehal a ni Michael Brian Perez, sigud a presidente ti Liga ng mga Barangay iti Urdaneta ken maysa kadagiti nangidarum, iti desisyon ti Ombudsman a nagtaud manipud pay iti isyu idi tawen 2022.
Segun kenkuana, impila na iti reklamo tapno masungbatan iti problema ti liderato ken panangimaton iti lugar da, kasta a masuportaran dagiti residente iti Urdaneta City.
