BR LA UNION – Kimmapasot ken nagbalinen a low-pressure area (LPA) ti sigud a Tropical Depression Luis, maibasar iti 11:00 p.m. tropical cyclone bulletin ti Philippine Atmospheric, Geophysical and Astronomical Services Administration (PAGASA).
Naudi a nasaripatpatan iti LPA idiay bisinidad ti Peñablanca, Cagayan, kabuyog ti central pressure a 1002 hPa ken agtultuloy nga agturong iti laud amianan-a-laud iti kapartak a kilometro kada oras.
Inikkat metten ti PAGASA iti ballaag ti bagyo iti sadinuman a paset ti pagilian.
Nupay kasta, impakdaar ti PAGASA nga agtultuloy iti napipigsa a panagtudo iti sumagmamano a lugar iti Luzon.
Namnamaen iti 100 agingga 200 millimeter a panagtudo ditoy La Union, Pangasinan, Benguet, Tarlac, Zambales ken Bataan agingga rabii ti Martes (Agosto 4).
Segun iti weather bureau, nangato ti posibilidad ti nalawa a panaglayos, nangruna iti nababa a lugar ken kadagiti asideg ti karayan.
Posible pay ti panagregga-ay ti daga kadagit lugar nga apektado ti LPA.
Kabayatanna, namnamaen a makapadas ti 50 agingga 100 millimeter a tudo idiay Ilocos Sur, Ifugao, Mountain Province, Nueva Vizcaya, Nueva Ecija, Aurora, Bulacan, Pampanga, Metro Manila, Cavite ken Batangas.
Posible met a makapadas dagiti nasao a lugar ti localized flooding partikular iti nababa a lugar ken asideg iti karayan ken posible pay ti landslide.
