Kinarit ni mamamayang Liberal Party-list Rep. Leila de Lima ti China a pumanaw iti teritorio ti Pilipinas ken paneknekanna ti tarigagayna a kappia, kasaruno ti statement ni Chinese Ambassador Jing Quan a nalaka laeng nga agballigi ti Beijing no agusar daytoy ti puersa kontra iti Pilipinas.
Segun kenni De Lima, saan nga agtunos ti statement ti China iti aramidna iti West Philippine Sea (WPS), pakairamanan ti mapapati a panangriribuk kadagiti mangngalap a Pilipino. Innayonna pay nga agtultuloy ti panangidepensa ti pagilian ti soberanya ken iti karbengan na.
Mainaig iti daytoy, kinondenar met ti House Young Guns bloc ti palawag ti embahador, ken kinuna a maibilang daytoy a kas pammutbuteng imbes a diplomasia.
Impaganetget pay ni Deputy Speaker Paolo Ortega V a saan a garantiya iti kinakapia ti panagpangta ti nabilbileg a pagilian ti basbassit nga estado.
Nagpanawagan met da Deputy Speakers Jay Khonghun ken dadduma pay a kameng ti bloc a respetuen ti China ti international law, ti United Nations Convention on the Law of the Sea (UNCLOS) ken ti 2016 arbitral ruling. Inallukoyda pay iti Beijing nga isardengen ti panangriribuk kadagiti mangngalap ken kadagiti kameng ti Philippine Coast Guard.
Impaganetget ti grupo a nasken a marukod ti kappia iti panagraem iti karbengan ti Pilipinas, ti kinatalged dagiti mangngalap ken ti wayawaya ti pagilian a mangipakat iti karbengan na iti exclusive economic zone.
