Temporaryo a mairikep ti two-way lane ti Gomez Street ditoy Siudad ti San Fernando, La Union manipud ita a bigat, Oktubre 18 agingga 21, 2026, kas panagsagana iti panagsangbay ti Pilgrim Image of Our Lady of Guadalupe ditoy siyudad.
Maibasar iti naipaulog a road advisory ken City Resolution No. 26-549, maipatungpal ti road closure, mangrugi alas dose ti tengngat rabii agingga alas otso ti rabii manipud October 18-21, 2026.
Mainaig iti daytoy, mabalakadan dagiti motorista nga agusar iti alternatibo a ruta tapno maliklikan ti pannakasinga ti panagbiahe.
Maipalagip pay kadagiti motorista a surotenda dagiti agdama a traffic advisories ken instruksiyon dagiti otoridad a mangimatmaton iti naannayas a trapiko iti nasao a lugar tapno masigurado ti kinatalged ken urnos iti kalsada.
Manamnama nga agsubli iti normal nga ayus ti trapiko iti Gomez Street apaman a malpas dagiti naikeddeng nga aktibidad.
Kabayatanna, ti isasarungkar ti Pilgrim Image of Our Lady of Guadalupe ditoy siyudad ti San Fernando ket maysa a narelihiosuan nga aktibidad a manamnama a tabunuan dagiti deboto.
Mainaig iti daytoy, madawat ti pannakaawat ken panagtitinnulong ti publiko seknan kadagiti maipatpatungpal nga addang tapno masigurado ti naannayas a pannakaisayangkat ti nasao nga aktibidad.
