Target ti House prosecution panel nga isubmitir ti pormal nga offer of evidence kontra kenni Vice President Sara Duterte sakbay ti Oktubre 23 a deadline tapno mapapartak ti impeachment trial idiay Senado.
Segun kenni House prosecutor Joel Chua, isagsaganan ti panel dagiti dokumento a kayatda nga awaten ken ikonsiderar ti impeachment court. Adda met sangapulo nga aldaw ti depensa manipud pannakaawatna tapno mangisubmitir ti komento ken panagkedked.
Iti testimonia ti forensic accounting expert a ni Atty. Alexander Cabrera, mapattapatta a P817.87 milion ti mapapati a saan a mailawlawag a kinabaknang a nainaig kada VP Sara ken asawana a ni Manases “Mans” Carpio manipud tawen 2022 agingga 2025. Mabalin a dumanon daytoy iti P1.5 billion maibasar ti sabali pay a kalkulasyon.
Ti panaganalisar ket naibasar kadagiti rekord ti banko, income tax returns, dokumento ti insurance, corporate filings ken Statement of Assets, Liabilities and Net Worth (SALN).
Idi Oktubre 13, inawat ti Senate impeachment court ti pannakaibabawi ti prosecution iti tallo nga artikulo a mainaig iti maipagarup a saan nga umiso a pannakausar ti confidential funds, bribery ken grave threats. Gapu iti daytoy ti alegasion a saan mailawlawag a kinabaknang laengen ti kakaisuna a nabatbati nga isyu.
Nakaituding met nga agtuloy ti trial inton Nobiembre 9, nu sadino a manamnama nga idatag ti depensa ni Bise Presidente Sara Duterte ti ebidensiada, depende iti desision ti impeachment court iti formal offer of evidence ti prosecution.
